फ्राइडे रिलीज सिनेमा

फ्राइडे रिलिज अन्र्तगत यो शुक्रबार तीन नेपाली  एक हिन्दी र  एक अंग्रेजी गरी  पाँच सिनेमाहरु रिलिज हुँदैछन । सुवास कोइराला निर्देशित ‘अपवाद’ र शोभित बस्नेत निर्देशित ‘प्लान’ नेपाल भर एक साथ लाग्ने छन भने कृष्ण चापागाइँद्धारा निर्देशित सिनेमा ‘महान’ उपत्यकामा मात्र लाग्ने छ । यस्तै बलिउड रिलिज अन्तरगत ‘फरारी कि सवारी’ रिलिज हुदैंछ भने हलिउडबाट ‘प्रोमेथियस’ रिलिज हुँदै छ । 

अपवाद
मध्यमवर्गीय युवाको मनोभावलाई समेटेर बनाइएको सिनेमा ‘अपवाद’ काठमाडौंका सिभिल मल ,विग सिनेमा लगायत देशभरका ३० वटा सिनेमा घरहरुमा एकसाथ प्रदर्शन हुदैं छ । नव निर्देशक सुवास कोइरालाको निर्देशन तथा सुसन प्रजापतिको निर्माण रहेको सिनेमामा राजवल्लव कोइराला र निशा अधिकारीको प्रमुख भुमिका रहेको छ । उनीहरुका अलवा सिनेमामा रवि गिरी र विजया गिरी पनि देखा पर्दैछन । उज्वल मेगी गुरुङले संगीत दिएको ‘अपवाद’ मा  निर्माता ‘सुसन’ स्वयम्ले क्यामेरा चलाएका छन । डेनमार्क, अमेरिका र अष्टे«लियामा प्रर्दशन भइसकेको सिनेमा ‘अपवाद’ बेलायतमा प्रर्दशन हुँदैछ । ओभरसिजका दर्शकको सकारात्मक प्रतिक्रिया पाएको ‘अपवाद’ लाई नेपाली दर्शकले पनि मन पराउने आशा राखिएको छ ।

प्लान
शोभित बस्नेत निर्देशित यो सिनेमा एक सांगीतिक व्यान्डको कथामा आधारित सिनेमा हो । कविता श्रेष्ठको निर्माण रहेको ‘प्लान’मा मुकेश ढकाल ,धिरेन शाक्य , रागिनी खड्की, राजेन्द्र खड्की आदिको मूख्य भूमिका रहेको छ । यस सिनेमामा स्वयम् निर्देशक बस्नेत पनि एक डिजेका रुपमा प्रस्तुत हुदैं छन । दिनेश न्यौैपानेको कथा रहेको ‘प्लान’ मा राम श्रेष्ठको संगीत रहेको छ । त्यस्तै कृष्ण श्रेष्ठको छायाँकनमा राजेन्द्र खड्कीले द्धन्द्ध निर्देशन गरेका छन् ।

महान
‘आफ्नो लागि सबै बाँच्छन तर अरुको लागि बाँच्ने मान्छे महान हुन्छ’ भन्ने मूल विषयलाई उठाएको यो सिनेमा काठमाडौंका लगभग १४ वटा सिनेमा घरहरुमा प्रदर्शन हुँदैछ । एक्सन तथा पारिवारिक धारको भनिएको यो सिनेमा साढे २ वर्ष अगाडी मोफसलमा प्रदर्शन भइसकेको छ । अहिले क्यू सिस्टम अन्तरगत यो सिनेमा उपत्यकामा प्रर्दशन हुन लागेको हो । दिनेश शर्माले निर्माण गरेको सिनेमा ‘महान’ लाई कृष्ण चापागाइँले निर्देशन गरेका हुन । यसका द्घन्द्घ निर्देशक एन बि महर्जन हुन । 

फरारी कि सवारी
यी तीन नेपाली सिनेमा सँगै रिलीज हुने बलीउड सिनेमा हो फरारी की सवारी । राजेश मपुस्कर निर्देशित ‘फरारी कि सवारी’ एक पारिवारिक कथावस्तुमा आधारित सिनेमा हो । यस सिनेमामा सरमन जोशीे मुख्य भूमिकामा देखिदैं छन । विधु विनोद चोपडाको कथा तथा निर्माण रहेको सिनेमामा सरमनका अलवा बोमन इरानी ,रित्भिक सावरे र परेश रावलको पनि अभिनय देख्न सकिन्छ । संगीतकार प्रीतमले संगीत दिएको ‘फरारी कि सवारी’ मा सुधिर पल्सानेको सिनेम्याटोग्राफी रहेको छ ।

प्रोमिथियस
हलीउड सिनेमा प्रोमिथियसले पनि नेपालमा ओपनीङ गर्दैछ । प्रोमीथियस विज्ञान कथामा आधारित रिडले स्कटद्घारा निर्देशित सिनेमा हो । यसलाई जोन स्पेट्स र डेमन लेंन्डेलोफले लेखेका हुन् । यसमा नाओमी र¥यापेस, माइकल फासबेन्डर, इदरिस एल्बा तथा चार्लिज थेरोन आदीको मूख्य भूमिका रहेको छ ।

छवि क्याम्पमा फेरि रेखा

तपाईहरु नझुक्किनुस् यहाँ हामी नायिका रेखा थापाको हैन संगीतकार रेखा पौडेलको बारेमा कुरा गर्दैछु । मेरो सिनेमा गत मंगलबार काठमाडौंको पानीपोखरी स्थित म्युजिसियन स्टुडियो पुग्दा संगीतकार रेखा पौडेल गायिका अन्जु पन्तलाई गीत गाउन निर्देशन दिइरहेकी थिइन । अन्जु पनि रेखाले सिकाए अनुसार गाइरहेकी थिइन । अर्को कोठामा (स्टुडियो भित्र) गीत गाइरहेकी अन्जुको वल्लो कोठामा आवाज मात्र सुन्न सकिन्थ्यो । गीत गाउँदा गाउँदै बिच बिचमा हुने सानो ब्रेकमा ख्याल ठट्टा गरेर अन्जुले वातावरणलाई रमाइलो पनि बनाइ रहेकी थिइन ।


प्रस्तुत दृश्य छविराज प्रोडक्सनको ब्यानरमा बन्न लागेको पहिलो सिनेमा ‘हमेशा’ को गीत रेकर्डीङको क्रममा देखिइको दृश्य हो । अन्जुलाई गीतमा निर्देश दिइरहँदा रेखा स्यवम् चाँही यस सिनेमाका निर्देशक सबिर श्रेष्ठलाई ‘भयो त डाइरेक्टर साब’ भन्दै बेला बेलामा सोधिरहन्थिन । जवाफमा सबीर पनि भए नभएको प्रतिक्रिया दिइरहेका थिए ।
‘वसन्ती रंग सारा सोरेर दिन्छु आजै’
तिमीलाई तिमीसँग चोरेर लिन्छु आजै’
निर्देशक सबीरका अनुसार सिनेमामा यो गीत कथाका पात्रहरु (पति–पत्नी) घुम्न गएको बेलामा एकले अर्कोलाई असीम माया दर्शाउने क्रममा राखिने गीत हो । यस रोमान्टिक गीतमा अन्जुलाई पुरुष स्वरमा गायक दिपक लिम्बुले साथ दिनेछन् । यो गीतलाई वरिष्ठ गीतकार किरण खरेलले लिपिबद्ध गरेका हुन् । कुल चार गीत रहेको यस सिनेमाका अन्य तीन गीत पनि स्वयंम खरेलले नै श्रृजना गरेका हुन् । यसअघि थुप्रै एल्बमहरुमा संगीत भरिसकेकी रेखाको ‘हमेशा’ दोश्रो सिनेमा हो । यस सिनेमाका गीतहरुमा अन्जु र दिपक लिम्बुका अलावा गायक प्रमोद खरेलले पनि स्वर दिएका छन् । मेरो सिनेमासँग कुरा गर्दै संगीतकार पौडेलले आफ्नो यो गीत हिट हुनेमा पूर्ण विश्वस्त रहेको बताइन ।

आर्यन रिजेक्टेड भुवन एसेप्टेड

केही समय अगाडी नायक आर्यन सिग्देललाई भिषा दिन अस्वीकार गरेको अष्ट्रेलियन दुतावासले सदाबहार नायक भुवन के.सीलाई भने खुला दिलले स्वागत गरेको छ । अर्थात उनको भिषा लागेको छ । उनको पासपोर्टमा अष्ट्रेलियाको भिषा हिजो लागेको हो । उनी त्यहाँ उनको पछिल्लो सिनेमा ‘साथी म तिम्रो’ को प्रर्दशनका लागि जान लागेका हुन् ।




उनको सिनेमा ‘साथी म तिम्रो’ लाई जुन २३ र २५ तारिखमा सिड्नीमा प्रर्दशन गरिने छ । त्यसैगरी एक हप्तापछि मेलवर्न शहरमा पनि सो सिनेमाको प्रर्दशन गरिने भएको छ । सो कुराको जानकारी नायक भुवन के.सीले मेरो सिनेमालाई फोनमा बताएका हुन् । सिनेमा प्रर्दशनका लागि के. सी करिब बीस दिन जति अस्ट्रेलियामा रहनेछन् ।


नेपालमा औसत ब्यापार गरेको उनको सिनेमालाई अष्ट्रेलियाका दर्शकहरुले कस्तो रुपमा लिने हुन त्यो भने हेर्न बाँकी नै छ । शिब रेग्मी निर्देशित यस सिनेमामा नायक भुवन के.सीका अलावा रेखा थापा बाल कलाकार शीर्षक सापकोटाले मुख्य भुमिका निभाएका छन् । उनका छोरा अनमोल के.सीले पनि यस सिनेमामा विशेष भुमिकामा देखिएकाका छन् ।

बिकास बोर्ड कर्मचारीद्धारा पेन डाउन

घुष काण्डले संस्थाको बेइज्जत भएको भन्दै चलचित्र बिकास बोर्डका कर्मचारीले दोषी माथि कारबाहीको माग गर्दै आज एक दिनका लागि पेन डाउन गरेका छन् । बिहान दश बजेदेखि पेन डाउन गरका उनीहरुले पुरै दिनभर कार्यालयको कामकाज ठप्प पारे ।
'संस्थाको बेईज्जत भईरहको अवस्थामा जव सम्म दोषीमाथि कारबाही गरिन्न तव सम्म आन्दोलनका विभिन्न कार्यक्रम हाम्रो तर्फबाट यसरी नै जारी राख्ने छौ', नेपाल राष्ट्रिय कर्मचारी संगठनका अध्यक्ष आनन्द घिमिरेले फिल्मीखबर समक्ष भने, 'यो ब्यक्ति भन्दा पनि संस्था प्रति उठेको प्रश्न हो तसर्थ मिडियामा आएका विभिन्न समाचार बमोजिम बोर्डले पनि आफ्नो तर्फबाट यो बिषयमा आफ्नो भनाई राख्नु पर्छ ।चाबहिल चुच्चेपाटीमा निर्माणाधिन अवस्थामा रहेको केएल सिनेमा सिटीको करोडौं पर्ने समान भन्सार छुटाउने बहानामा निर्माता संघबाट प्रतिनिधिको रुपमा बोर्ड सदस्य भएका निलहरी काफ्लेले घुष लिएको आरोप लागेपछी बोर्ड कर्मचारीले दोषीमाथि कारबाहीको प्रक्रिया चाल्न नेतृत्व तहलाई दवाव दिएका हुन् । उता निर्माता संघले निलहरीलाई दोषी ठर्याउदै बोर्डबाट फिर्ता बोलाउने निर्णय गरिसक्दा पनि काफ्ले बोर्ड पुगेर विभिन्न बहानाबाजी गरेपछी कर्मचारीले यो बिषयमा नेतृत्व तहको ध्यानाकर्षण गराउन पेन डाउन गर्न बाध्य भएका हुन् ।

बोर्डका एक कर्मचारीले भने, 'आफ्नो संस्थाले फिर्ता बोलाई सके पनि उहाँ बोर्ड आएर विभिन्न बाहानबाजी देखाएपछी हाम्रो असन्तुष्टी बाहिरिएको हो ।' असन्तुष्ट कर्मचारीहरुले आउदो सोमबार बिहान ११ बजे देखि २ घण्टा बोर्डमा धर्ना कार्यक्रम पनि राखेका छन् । संगठन प्रमुख घिमिरेले आईतबार सम्म पनि नेतृत्व तहबाट कुनै निर्णय नआए सोमबार बिहान ११ बजे देखि २ घण्टा धर्ना कार्यक्रम गर्ने निर्णय गरेका पनि जानकारी गराए ।

यसैगरी संगठनका अध्यक्ष घिमिरेले बोर्डको तर्फबाट गठन गरिएको भ्रष्टचार छानविन समितिमा एक जना मात्र सदस्य रहेको प्रति असन्तुष्टी पनि जनाएका छन् । उनले प्रश्न गर्दै भने, 'कस्तो अचम्मको कुरा छानविन समितिमा पनि कहि कतै एक जना सदस्यमा मात्र हुन्छ ? तसर्थ सो समितिमा थप सदस्य राख्नु पर्छ भन्ने हाम्रो अर्को माग पनि हो ।' गत जेठ २४ गते बोर्ड अध्यक्ष गणेश भण्डारीले आफ्नो तर्फबाट भ्रष्टचार छानविन समिति गठन गरेका थिए जसको जिम्मेबारी अहिले बोर्ड प्रवक्ता विकास आचार्यलाई दिईएको छ । सो समितिले आरोप लगाएको केएल सिनेमा सिटीलाई लिखित रुपमा घुष मागेको बिषयमा आफ्नो धारणा पेश गर्न आग्रह गरेको छ ।

आन्दोलनको पहिलो चरण स्वरुप पेन डाउन गरेका कर्मचारीहरुले सदाचारीलाई प्रोत्साहन गरौं, भ्रष्टचारीलाई बिहिस्कार गरौं लगायतका पम्प्लेट बोर्ड परिसरमा टाँस्दै नेतृत्व तहको ध्यानाकर्षण गराएका छन् ।
Source: Filmy Khabar

प्लानको पब्लिसिटीका लागि मुकेश

भोली शुक्रबारबाट राजधानीका हलमा प्रदर्शन हुन लागेको फिल्म 'प्लान' को पब्लिसिटीका लागि नायक मुकेश ढकालले लफडाको सुटिङ छोडेका छन् । गत सोमबारबाट चितवनमा छायाँकन भईरहेको किशोर चौधरी निर्देशित फिल्म लफडाबाट दुई दिनको बिदा मागेर मुकेश प्लानका लागि बुधबार काठमाण्डौ आएका हुन् ।

निर्माता कविता श्रेष्ठले मुकेश बिना पब्लिसिटी नहुने भन्दै उनलाई दुई दिनका लागि भए पनि बिदा मिलाएर काठमाण्डौ आउन आग्रह गरेकी हुन् । मुकेशले पनि आफू लिड रोलमा रहेको फिल्म भएकाले बिदा मागेर पब्लिसिटी गर्न आएको बताए । आज दिनभर फिल्मको पब्लिसिटीका लागि सञ्चारमाध्यम धाउने र भोली हलहरूमा पुग्ने उनको योजना छ । मुकेशलाई पब्लिसिटीमा नवनायक ध्रुब न्यौपाने पनि फिल्मको पब्लिसिटीमा सघाउनेछन् ।



यसै फिल्मबाट डेब्यू गरेकी नायिका रगिनी खड्गी भने पब्लिसिटीमा सहयोग गर्न नसक्ने भएकी छिन् । उनी लफडाको सुटिङमा रहेकाले काठमाण्डौ आउन नसक्ने उनीसँगै काम गरेका नायक ढकालले बताए । फिल्मका निर्देशक सोभित बस्नेत आफ्नै होमप्रोडक्सनको फिल्म जाउँ हिड पोखराको सुटिङमा व्यस्त भएकाले उनले भने पब्लिसिटीमा सहयोग गर्न नसक्ने भएका छन् । निर्देशक नै नभए पछि अहिले निर्माता श्रेष्ठ आफैले निर्देशकको अभिभारा बोक्दै सञ्चारमाध्यम धाएकी छिन् ।

सोभित सम्पर्कमा समेत आउन नचाहेको गुनासो पोख्दै कविताले भनिन्, 'फोन नै नलाग्ने बनाएर बस्नु भएको छ त्यसैले अहिले म नै निर्देशक बन्नु परेको छ ।' यता फिल्मको डिस्ट्रिव्युसन पनि आफै गरेको कविता बताउँछिन् । यस्तै फिल्मका दुई नायिका अनिता दाहाल र अनुष्का ढकाल पनि पब्लिसिटीमा आउने छैनन् । कविता भन्छिन्, 'उनीहरूले त शुरू देखि नै फिल्मको पब्लिसिटी गर्न चाहेका छैनन् ।'


भोलीबाट राजधानीका एक दर्जन भन्दा बढि हलमा फिल्म लाग्ने बताउँदै निर्माता श्रेष्ठले असार ८ गतेबाट मोफसलका हलमा लाग्ने जानकारी गराईन् । फिल्म डिजेहरूको कथामा आधारित रहेको बताईएको छ ।


यस्तै भोलीबाट सुवास कोईराला निर्देशित फिल्म अपवाद पनि लाग्दैछ । राजबल्लभ कोईराला र निशा अधिकारी अभिनित फिल्म राजधानीमा मुख्य मल्टिप्लेक्स सहित देशभरका हलमा लाग्नेछ । अर्न्तराष्ट्रिय बजारमा रिलिज भएको र भईरहेको सो फिल्मले राम्रो प्रतिक्रिया पाईरहेको छ । फिल्मलाई सुसन प्रजापतीले निर्माण गरेका हुन् । भोली शुक्रबार क्यू सिस्टमबाट महान फिल्म पनि लाग्नेछ । मोफसलमा रिलिज भईसकेको यो फिल्म भने राजधानीमा अपवाद र प्लानसँग भिड्नेछ ।Source: Filmy Khabar

मायाज बार शिर्ष गीत प्रिमियर

सुटिङ समय देखिनै निकै चर्चामा रहेको बहुप्रतिक्षित फिल्म मायाज बारको शिर्ष गीत फिल्मीखबर मार्फत अनलाईन प्रिमियर गरिएको छ । दिनेश डिसीको निर्देशनमा बनेको सो फिल्मको संगीतकार डिसी क्याम्पका सुरेश अधिकारी हुन् । संगीतकार अधिकारी मायाज बारको गीत रचनाकार पनि हुन् ।


शिर्ष गीत गाउने गायिका आस्था राउत हुन् जसको स्वरले फिल्मी मार्केट तताउने आंकलन काटिएको छ । बोल्ड भ्वाईसकी धनि आस्थाले यस अघि केही चर्चित गीत गाए पनि उनी ओझेलमा परेकी थिईन् । सार्वजनिक गीतको सुरूवातर अन्त्यमा निर्देशक डिसीको पनि स्वर सुन्न सकिन्छ । बहुप्रतिभाका धनी डिसी एक कुशल गायक पनि हुन् यध्यपी उनले गायन कलालाई सौखको रूपमा मात्र कहिले काही प्रयोग गर्ने गर्छन् ।


फिल्मलाई डिसी क्याम्पका अर्का छाँयाकार पुरूषोत्तम प्रधानले खिचेका हुन् जो फिल्मी मार्केटका सर्वाधिक रूचाईएका छाँयाकार पनि हुन् । यसैगरी लिड हिरो गजित बिष्ट डिसीले सञ्चालन गरेको खोजि प्रतिभा सिजन वानबाट छनौट भएका कलाकार हुन् जसलाई डिसीले मायाज बार मार्फत हिरोको रूपमा डेब्यू गराए । लुटको निकै चर्चित गीत उध्रेको चोलीको कोरियाग्राफी गरेका गम्भीर बिष्ट मायाज बारको पनि कोरियाग्राफर हुन् । गम्भीर मायाज बार हिरो गजितका भाई हुन् ।गम्भीरको निर्देशनमा मायाज बार हिरोईन निशा अधिकारीले माया माया भनी बार डान्स गरेकी छिन् । निशाको फिल्मी करिअरको यो पहिलो आईटम डान्स हो । यो गीतमा निशाले गरेको डान्सले एकपटक माहोल तताउने बिश्वास पनि गरिएको छ । सुटिङ सिध्याउन मात्र तीन महिना लागेको सो फिल्म श्रीराम बालाजी फिल्मसको ब्यानरमा सुनिल मानन्धरको डेढ करोड लगानीमा बनेको हो । फिल्म श्रावण १८ देखि मोफसल र १९ गते देखि राजधानीमा लाग्दैछ जसको प्रचार प्रसार तिब्र पारिएको छ ।

`सुनगाभा` लाई दशैंमा ल्याउने योजना

समलिंगी दुई युवतीको मनोवैज्ञानिक कथा भनिएको फिल्म 'सुनगाभा' लाई दशैंको छेकोमा रिलिज गर्ने तयारीमा छन् निर्देशक सुवर्ण थापा । फ्रान्सबाट फिल्मीखबरसँग कुरा गर्दै निर्देशक थापाले भने, 'बितरकको निधो भएपछि हामी रिलिज डेट फाईनल गर्नेछौं । हाम्रो योजना भने दशैंमा रिलिज गर्नु रहेको छ ।'


गत मे २० तारिखका दिन कान्स फिल्म फेस्टिभलको फिल्मी बजारमा प्रदर्शन गरिएको सो फिल्ममा निशा अधिकारी र दिया मास्के समलिंगीको भुमिकामा छन् । फेस्टिभलबाट राम्रो प्रतिक्रिया पाएका निर्देशक थापाले नेपालबाट पनि राम्रो सफलता पाउने बिश्वास लिएका छन् । फ्रान्सको पेरिसमा नै पोस्टप्रोडक्सन गरिएको सो फिल्ममा सौगात मल्ल पनि मुख्य भुमिकामा छन् ।


अलिक फरक कथाबस्तुमा फिल्म बनाउन रूचाउने सुवर्णको यस फिल्मले नेपाली दर्शकलाई नयाँ स्वाद दिनेछ भन्ने बिश्वास निर्माण युनिटको छ । काठमाण्डौमा सुटिङ गरिएको फिल्मलाई फ्रान्सेली छायाँकार सारा कोर्नुले खिचेकी हुन् । स्नो फ्लावर्सबाट सुनगाभा बनाईएको सो फिल्मको कथा निर्देशक थापाले नै लेखेका हुन् भने निर्माताको रूपमा निर्देशक थापाको साथमा रप्सोडी प्रोडक्सन रहेको छ ।

विकास बोर्डले `9 O`clock` को सुटिङ रोक्यो

दर्ता बिना सुटिङ गरिएको भन्दै चलचित्र विकास बोर्डले फिल्म '9 O'clock' को सुटिङ रोकिदिएको छ । आज गोदावरीमा सुटिङ भईरहेका बेला बोर्ड सदस्यले दिउँसो एक बजे तिर सुटिङ रोक्न आग्रह गरेकाले आफूहरूले सुटिङ ब्रेक गरेको निर्देशक बाबुराम ढकालले फिल्मीखबरलाई जानकारी दिए ।निर्देशक ढकालले सुटिङ रोक्ने आदेश आउँदा आफू तीन छक परेको बताए । उनले भने, 'अध्यक्ष गणेश भण्डारी ज्यूले सुटिङ गर्दै गर्नु भनेर मौखिक आदेश दिनुभएकाले हामीले सुटिङ थालेका थियौं तर आज आएक एक्कासी रोक्ने आदेश आउँदा हामीलाई दु:ख लागेको छ ।' यता अध्यक्ष भण्डारीले फिल्मको स्क्रिप्ट सच्चाएर नाम दर्ता गरेर मात्र सुटिङ गर्न आग्रह गरेको बताए । जेष्ठ २४ गतेबाट सुटिङ शुरू भएको सो फिल्मको ४० % काम सकिएको बताईएको छ ।यता सुटिङ रोकिएकाले भोली बोर्डसँग छलफल गरि सुटिङ प्रक्रिया अगाडी बढाउने निर्देशक ढकालले बताए । तर भर्खरै मात्र गठन भएको स्क्रिप्ट छनोट समितीले यस फिल्मको स्क्रिप्टलाई नसच्याए सम्म कुनैपनि हालतमा पास नगर्ने बुझ्नमा आएको छ । फिल्मको स्क्रिप्ट अश्लिल भएको र निर्देशकले दिएको 'लजिक' चित्त बुझ्दो नभएकाले स्क्रिप्टलाई पास नगर्ने तयारी सो समितीले गर्दैछ ।


शुरूमा फिल्मको नाम 'A 69' राखिएको थियो तर बोर्डले सो नाम अश्लिल भएको भन्दै परिवर्तन गर्न सल्लाह दिएपछि युनिटले '9 O'clock' राखेको हो । नाम परिवर्तन गरे पनि युनिटले स्क्रिप्ट पनि परिवर्तन गर्नुपर्ने देखिएको छ अन्यथा सो फिल्म युनिटलाई ठूलै झट्का लाग्नेछ । विकास बोर्डले केहि दिन अगाडी मात्र एक प्रेस विज्ञप्ती जारी गरि दर्ता बिना सुटिङ नगर्न आग्रह गरेको थियो । बोर्डको सो कुरालाई बेवास्ता गर्दै अझै पनि केहि फिल्म युनिटले नाम दर्ता नगरी सुटिङ गरिरहेको पाईएको छ ।
यो दर्ता प्रक्रियामा बोर्ड लचिलो बन्छ या कडाईका साथ नियमलाई लागू गर्छ हेर्न बाँकी छ ।